Kven kan få tilbodet?
Voss herad tilbyr bustader til vanskelegstilte bustadsøkjarar og personar med spesielle behov.
Kommunen sine bustader til vanskelegstilte:
- Bustader for fyrstegongsbusetting av flyktningar
- Bustader for helsemessig, sosialt og økonomisk vanskelegstilte
- Bustader for rusmisbrukarar
- Ettervernsbustader
Kva kan du få hjelp til?
Voss Herad skal leggja til rette for at vanskelegstilte bustadsøkjarar og personar med spesielle behov busette i Voss kommune skal få leiga nøktern og eigna kommunal bustad.
Kor stor bustad som vert tildelt vil vera avhengig av hustanden sin størrelse.
Det skal søkjast om statleg bustøtte til delvis dekning av husleiga for dei med låg/ingen inntekt.
Kriteria og vilkår:
- Må vera fylt 18 år
- Må ha lovleg opphald i Norge
- Må ha fast adresse eller ha vore busett/hatt opphald i Voss kommune dei siste 6 månadene
- Er utan eigen, sjølvstendig bustad
- På grunn av helsemessige eller sosiale årsaker har behov for endring av noverande buforhold
- Av helsemessige eller sosiale årsaker har behov for oppfylging i bustad
- Av helsemessige eller sosiale årsaker har behov for spesielt tilrettelagt bustad
Leigetakarar skal aktivt freiste å skaffe seg eigen bustad i leigeperioden med kommunen.
Kommunal bustad
Søknad om kommunal bustad for alle søkjarar skal sendast Voss kommune, Postboks 145, 5701 Voss, eventuelt leverast på Kundetorget til kommunen. Søknaden skal registrerast inn i saksjournal til Voss kommune og oversendast bustadkonsulenten i kommunen. Søknaden må vera fullstendig utfylt og nødvendig dokumentasjon må vera vedlagt. Ved behov for bistand ved utfylling av søknad om kommunal bustad kan dei ulike einingane hjelpa sine brukarar å fylla ut søknadsskjema.
Ein kan og få bistand til utfylling av søknaden i NAV Mottak eller i samtale med bustadkonsulenten. Bustadkonsulenten registrerer søknader og videresender søknadar til dei ulike instansar i kommunen som har oppfylgingsansvar av søkjar.
Voss kommune disponerar alle kommunale bustader og bustader som kommunen har eksklusiv tildelingsrett til. Tildeling av kommunal bustad vert avgjort normalt ein gong i månaden, eventuelt administrativt ved behov.
Eit positivt vedtak om leige av kommunal bustad skal vise kva type bustad søkjar skal tildelast, leigekontrakten si lengde, størrelse på bustad og eventuelt andre vilkår som må føreliggja for at søkjar skal kunne tildelast bustaden.
Avslag på søknad om kommunal bustad skal begrunnast.
Vedtak i henhold til rutinen kan klagast på til Voss herad si klagenemnd. Klagen skal sendast til Voss kommune, Pb 145, 5701 Voss og skal oversendast bustadkonsulenten i kommunen. Klagefrist er 3 veker frå det tidspunktet søkjar er gjort kjent med vedtaket.
Gjenstand for klage ved positivt vedtak kan vera at bustaden ikkje er egna med omsyn til type bustad, tal rom, fysisk tilgjengelighet til bustaden og lengde på vedtak under 3 år. Bustaden si adresse vil vanlegvis ikkje vera sakleg grunn.