NIBIO leverte kunnskapsgrunnlag til strategien, Grunnlag for jordvernstrategi for Voss herad, våren 2025.
Kunnskapsgrunnlaget tar for seg produksjonspotensialet i Voss herad, og analyserer nedbygging og attgroing i perioden 2005 til 2024. NIBIO peikar på kva faktorar som har ført til tap av dyrka og dyrkbar jord. NIBIO ser også på kva areal som ligg til framtidig omdisponering i gjeldande kommuneplan og gjev råd til tiltak for å styrka jordvernet.
Jordvernstrategien er arbeidd med i intern arbeidsgruppe og ekstern referansegruppe. Det har i tillegg vore medverknad frå borgarpanel i samband med rullering av kommuneplanen.
Hovudmålet med jordvernstrategien er å syta for at Voss herad ikkje omdisponerer meir enn i gjennomsnitt 7 dekar dyrka jord årleg. Jordressursane i Voss herad skal haldast i hevd og ikkje gå tapt. Dette gjeld særleg dyrka jord, men også dyrkbar jord som kan dyrkast opp utan at det påverkar naturmangfaldet negativt.
Strategien er bygd opp om seks overordna tema som det er knytt konkrete tiltak til:
- Jordvern i planar
- Flytting og kompensering av matjord
- Omsyn til jordressursar i landbruksnæringa
- Hindra attgroing, og jordvern gjennom bruk
- Sikra matberedskapen og auka produksjonsmangfaldet
- Jordvern i utmark.