Kvifor?
Etikk er systematisk tenking om kva som er rett og gale.
Eit sunt lokaldemokrati byggjer på eit innbyrdes tillitsforhold mellom innbyggjarane og folkevalde. Våre veremåtar, haldningar og evne til å lytta, er med på å danna grunnlaget for innbyggjarane sin tillit til kommunen. Dei etiske retningslinene skal vera køyrereglane som skal hjelpa oss folkevalde å handla rett, slik at me arbeider til det beste for fellesskapet i tråd med lover, reglar, verdigrunnlag og politiske vedtak.
Sist endra 25.06.2021 11.57
Forankring og ansvar
Med omgrepet folkevald er det også meint andre utvals- og rådsmedlemar som har verv i Voss herad.
Du som folkevald har eit personleg og sjølvstendig ansvar for å fylgja retningslinene. Dersom du er i tvil om det kan vera brot på reglane, kan du ta dette opp med ordførar. Du har rett til å nekta å fylgja pålegg som er ulovlege eller fører til brot på dei etiske retningslinene.
Ordførar har ansvar for å formidla dei etiske retningslinene til dei folkevalde, leggja tilhøva til rette for etisk refleksjon, og har gjennom ord og handling særleg stor innverknad på kulturen og normene for veremåten i organisasjonen vår.
Etiske retningsliner
Tillit
- Me skal opptre på ein måte som skapar tillit hjå innbyggjarane og som ikkje skadar heradet sitt omdømme. Me skal vera rettferdige, ærlege og opne i ein kvar samanheng.
- Me lyttar til innbyggjarane og sikrar lik handsaming for alle. Me sikrar demokrati og medverknad.
- Me skal bidra til ein open og sakleg offentleg debatt.
- Dersom me har personlege verv i lag, organisasjonar eller verksemder, skal me registrera dette i styrevervregisteret.
- Me skal ikkje utnytta vår stilling til å oppnå personlege fordelar, eller få gåver av ein art som kan påverka handlingar eller vedtak. Gåver av låg verdi som blomar, konfekt eller liknande vert ikkje omfatta av retningslinene.
- Me skal aktivt arbeida mot korrupsjon og varsla dersom ein har mistanke om at korrupsjon finn stad. Me skal ikkje påverke tilsette direkte slik at dei opplever press til å gjera vurderingar ut over dei faglege.
- Me har sjølve ansvar for å opplysa om eigen habilitet. Ved tvil rundt habilitet skal me be om vurdering. Me skal vera medvitne om rollekombinasjonar som kan føra til interessekonflikt.
Pålitelege:
- Voss herad skal vera ein open organisasjon. I ein open organisasjon er offentlegheit og ytringsfridom viktige prinsipp for å sikra innsyn og kontroll over kommunen si verksemd.
- Me skal vera ærlege og truverdige, me skal seia i frå om kritikkverdige tilhøve og korrigera usanne opplysningar om politiske saker i samfunnsdebatten.
- Me skal vera rettvise og føreseielege.
- Me skal som folkevalde bruka eit klart språk slik at alle kan forstå innhaldet i politikken.
Inkluderande
- Me skal vera gode rollemodellar og syna klokskap i sosiale medium.
- Som folkevalde skal me respektera kvarandre og tilsette i heradet. Me skal ikkje opptre på ein måte som krenkjer menneskeverdet og me tek aktivt avstand frå diskriminering.
- Me skal visa toleranse for alle, uavhengig av kjønn, legning, etnisitet, funksjonsevne eller livssyn.
- Me skal sikra at alle vert verdsett, respektert og får ta del i fellesskapet .
- Me skal vera imøtekomande og lyttande.
- Me skal ta vare på kvarandre.
Etiske verktøy
Navigasjonshjulet:
I tillegg til den etiske vurderinga, kjem også andre omsyn. Navigasjonshjulet kan vera eit hjelpemiddel for deg når du skal vurdera kva du skal gjera.
Etiske retningsliner for folkevalde i Voss herad (PDF, 2 MB)