Kløve barnehage er ein kommunal barnehage som ligg i landlege omgjevnader på Kløve, om lag 9 km frå Voss sentrum. Naturen er ein del av kvardagen vår, og ein viktig del av det pedagogiske arbeidet.

Me er per i dag ein liten og oversiktleg barnehage, med to grupper:
Veslefrikk (1–3 år) og Askeladden (3–5 år).
Den nære ramma gir trygge relasjonar, tett vaksenkontakt og eit godt fellesskap.

Me er mykje ute heile året. I nærområdet har me eigen skog med gapahuk og lavvo, som gir gode moglegheiter for leik, utforsking og læring. Her får borna oppleva årstidene, utvikla motorikk og læra å ta vare på naturen rundt seg.

Me har òg snikkarbu og kjøkkenhage, som vert nytta gjennom året. Gjennom praktiske aktivitetar får borna erfara skaparglede, samarbeid og forståing for miljø og berekraft i kvardagen.