Skulebyte

Elevar har rett til å gå på ein skule i nærmiljøet. Voss herad har gjennom “Forskrift om skulekrinsar i grunnskulen” politisk vedtak om skulekrins og inntaksområde. Det er folkeregistrert adresse som avgjer kva skule ein elev soknar til.

Sist endra 17.09.2024 13.59

Forskrift om skulekrinsar for grunnskulen, Voss herad, Vestland (gjeldande frå 01.08.2024)

I Opplæringslova (oppdatert 01.08.24) § 2-6 om kva grunnskule eleven skal gå på heiter det at:

"Elevane har rett til å gå på ein skole i nærmiljøet. Kommunen kan gi forskrift om skolekrinsar. Ved tildeling av skoleplass og fastsetjing av forskrift om skolekrinsar skal kommunen leggje særleg vekt på kva skole som ligg nærst heimen. Kommunen kan også ta omsyn til topografi, trafikktilhøve og kapasiteten på skolane, og at barn i same nabolag skal få gå på same skole.

Etter søknad kan eleven takast inn på ein annan skole enn den eleven har rett til å gå på."

Inntaksområda i Voss herad

Kven kan søkja om skulebyte?

I Voss herad er utgangspunktet at elevar har skulegang ved skulen i nærmiljøet, jf. “Forskrift om skulekrinsar for grunnskulen”.  Det er folkeregistrert adresse som avgjer kva skule ein elev soknar til. Føresette kan søkja om at ein elev skal få gå ved ein annan skule enn den eleven soknar til i nærmiljøet.

Kriteria som kan gje grunnlag for skulebyte:

Søskenprioritering
Delt bustad
Mellombels adresseendring
Adresseendring
Spesielle tilhøve (fysiske utfordringar, funksjonsvariasjonar)
Sakkunnig vurdering
Gråsoneadresser (adresser som ligg på grensa mellom to inntaksområde)
Saker knytt til opplæringslova kapittel 12. skulemiljøet til elevane jf. (§§12-4 og 12-5)

I samband med søknad om skulebyte, vert det innhenta uttale frå rektor på noverande skule og rektor ved den skulen ein ynskjer å byta til.

I saker som gjeld skulebyte vil eleven sitt beste og eleven sin rett til å verte høyrd, verta vektlagt.

Voss Herad kan stilla vilkår om eigenbetaling av skuleskyss i vedtak om skulebyte. Dette gjeld ikkje dersom ei skuleplassering er tufta på retten til opplæring.

Kva skjer når eg skifter adresse?

Ved endring av folkeregistrert adresse skal det meldast flytting til den skulen som ny adresse soknar til. Adresseendring i folkeregistrert gjer ein på Folkeregister - Skatteetaten

Ein kan likevel søkja om å halde fram ved noverande skule ved:

Mellombels adresseendring: saker der det vert søkt om å halde fram ved noverande skule ved ei mellombels adresseendring- eksempelvis ved bygging av hus, og i saker der elev soknar til ein annan skule, men er forventa å flytta til gjeve skulekrins, innan rimeleg tid. Slike søknadar må visa til dato for dokumentert flytting. Eksempelvis datosett overtaking gjennom kontrakt av framtidig folkeregistrert adresse.
Adresseendring: elevar som har flytta til ein annan krins og har kort attverande tid att i grunnskulen (om lag 18 månader), kan søkja om å halda fram ved skulen ut avsluttande barne – eller ungdomsskuletrinn.

Søknad om skulebyte/ halda fram ved same skule