Nokon gonger har eit barn behov for meir tid og modning før dei startar på skulen. Då kan du søkja om utsett skulestart for barnet ditt. Det betyr skulestart det året barnet fyller sju år. 

Barnet ditt har rett til utsett skulestart dersom det etter sakkunnig vurdering frå pedagogisk psykologisk teneste (PPT), er tvil om at barnet har kome tilstrekkeleg langt i utviklinga si til å starta på skulen, og at dette er det beste for barnet.

Vanlege moment å vurdera er barnet si modning, barnet sitt kognitive og språklege nivå, barnet si evne til sosial tilpassing og eventuelt andre særlege forhold som kan ha innverknad på barnet si utvikling.

Vurderinga skal òg beskriva eit, eventuelt, barnehagetilbod ved utsett skulestart, samanlikna med eit tilpassa opplæringstilbod i skulen. Moment som gruppestørrelse, aldersfordeling, opphaldstid og organisering av tilbodet, skal beskrivast.
 

Framskunda skulestart vil sei at barnet startar på skulen det året det fyller fem år. 

Nokon barn har kome så langt i utviklinga si allereie som 4-5-åringar, at føresette tenkjer at det vil vera det beste for barnet å starta i skulen eitt år før dei som er like gamle.

Vanlege moment å vurdera ved framskunda skulestart er sosial modning, språkleg og kognitiv utvikling og modning i forhold til skulestart. 
 

• Alle barn skal skrivast inn på nærskulen det året dei fyller 6 år, òg i dei tilfella der det er søkt om utsett skulestart.

• Føresette som vurderer utsett/framskunda skulestart for barnet sitt, tek dette opp med pedagogisk personale i barnehagen og/eller PPT.

• Det er viktig at spørsmål om utsett/framskunda skulestart er avklart tidleg, og helst før innskrivinga til fyrste klasse startar. Søknad om utsett/framskunda skulestart må derfor vera sendt oppvekst seinast 20. desember det aktuelle året. 

• Om barnet skal ha utsett skulestart, har det rett på å behalda barnehageplassen sin. Det er derfor viktig at det vert avklart om barnet skal ha utsett skulestart, før barnehageopptaket startar.

• Dersom føresette ynskjer å søkja om utsett/framskunda skulestart, sender dei grunna søknad til oppvekst i Voss herad: postmottak@voss.herad.no Søknaden, og behov for meir dokumentasjon, vert vurdert i den enkelte saka. 

• Oppvekst vil senda saka over til PPT for ei sakkunnig vurdering. Føresette må gje sitt samtykke til dette. 

• PPT gjennomfører ei utredning og utarbeidar ei sakkunnig vurdering, der barnet anten vert anbefalt, eller ikkje anbefalt, utsett/framskunda skulestart. Den sakkunnige vurderinga er basert på opplysningar og dialog med føresette. Dersom andre instansar har kontakt med barnet, t.d. barnehage og helsesjukepleiar, kan det vera aktuelt å ta kontakt med desse. 

• Gjennomgåande vil det vera slik at desto seinare på året barnet er fødd, desto mindre sannsynleg er det at det vil vera til det beste for barnet å starta tidlegare på skulen.

• Den sakkunnige vurderinga vert sendt til føresette, med kopi til oppvekst.

• Oppvekst fattar vedtak i saka, og sender kopi til den aktuelle barnehage og skule.

Vedtak om utsett/framskunda skulestart er eit enkeltvedtak etter forvaltningslova, og kan klagast på. Klagen må vera postlagt innan 3 veker frå den dato vedtaket er motteke. 

Klagen skal sendast oppvekst, som vidaresender til Fylkesmannen si Utdanningsavdeling, som er klageinstans.
 

Lov om grunnskoleopplæringa og den vidaregåande opplæringa (opplæringslova) - Kapittel 2 Rett og plikt til grunnskoleopplæring - Lovdata

Lov om behandlingsmåten i forvaltningssaker (forvaltningsloven) - Lovdata