Kommuneplanen er vårt viktigaste verktøy når me skal leggja til rette for kva samfunnsutvikling, arealforvaltning og tenesteproduksjon me ynskjer i heradet vårt. Planen gjeld for alle som bur og arbeidar i Voss herad. 

Samfunnsdelen (KPS) skildrar kva langsiktige mål kommunen har for samfunnsutviklinga og skal kunna fungera som eit politisk styringsverktøy. Måla i samfunnsdelen vert styrande for kva andre planar kommunen vel å utarbeida, og skal også vera grunnlag for prioriteringar i årleg rullering av økonomiplanen. Økonomiplanen vert slik handlingsdelen til kommuneplanen.

Dei fem overordna måla i samfunnsdelen er:

1. Voss er ein attraktiv stad å bu, besøkja, arbeida og driva næring, der kulturkrafta fremjar både vekst og vern
2. Voss er bygd for alle, og innbyggjarane opplever meistring, tryggleik og deltaking i fellesskap
3. I Voss kuttar me klimagassutsleppa og tek vare på naturen for framtidige generasjonar
4. I Voss er me budd på å handtera større uynskte hendingar
5. Voss herad er ein berekraftig kommuneorganisasjon, økonomisk robust med tenester på rett nivå

Samfunnsdelen inneheld også ein arealstrategi som syner korleis samfunnsmåla vert vidareført i langsiktig arealutvikling. Arealstrategien vert slik koplinga mellom kommuneplanen sin samfunnsdel og kommuneplanen sin arealdel (KPA). Revisjon av kommuneplanen sin arealdel er godt i gang og det er venta at denne vert lagt fram til politisk handsaming ved årsskiftet 2026/ 2027.

Kommuneplanen sin samfunnsdel kan du lesa her: Samfunnsdelen

Arbeidet med kommuneplanen sin arealdel kan du fylgja her: Innspel til kommuneplanen sin arealdel