Mettande middag med lokal matkasse
Alle 9. klassane i Voss herad fekk tidlegare i november tildelt ein kasse med lokale grønsaker frå Finnegarden. Elevane skulle ta utgangspunkt i eit scenario der handelssystemet har brote saman, og me må klara oss med råvarer produsert i heradet. Oppgåva til elevane gjekk ut på å laga eit godt og mettande måltid av innhaldet i kassen. Dette opplegget vart gjennomført som del av eigenberedskapsveka og Grøn november, med føremål om å auka ungdomane sin kunnskap om lokal mat og korleis ein kan utnytta ressursane våre best mogleg.
Biletebevis frå Voss ungdomsskule om at måltidet ikkje berre vart smakfullt, men også fint å sjå på.
Matberedskap
Elevane skulle i utgangspunktet berre bruka innhaldet i kassen, men dette vart utført litt forskjellig ved dei ulike skulane. I Granvin fekk kvar gruppe 100 kr som dei fekk bruka på å supplera med varer frå butikken, og på Voss ungdomsskule fekk elevane tilgang på basisvarer som mjølk og mjøl. Ved Vossestrand freista dei å heilt unngå råvarer utanom det som låg i kassen, og fekk gode tilbakemeldingar frå rektor Kari Dymbe Dregelid:
– Elevane laga fantastisk god mat av gode råvarer. Me var heldige og fekk ein liten smaksprøve på personalrommet!
Nyttig lærdom
Cecilie Mathisen er lærar i mat- og helsefaget på Voss ungdomsskule, og fortel at fleire av ungdomane blei overraska over kor god maten vart. Særleg vart ulike variantar av grønsakschips trekt fram, både av potet, jordskokk og grønkål.
– På spørsmål om kva dei ville gjort annleis, var det fleire som trekte fram at dei gjerne skulle ha laga fleire variantar av chips, fortel Mathisen.
Den supre grønkålen
– Grønkål er enkelt å produsera og toler ein del frost slik at ein ofte kan hausta den gjennom vinteren. Det er i tillegg ei veldig sunn råvare som ikkje utan grunn vert kalla for «supermat», så den er lur å ha i hagen, fortel Knut Finne som leverte matkassane til 9. trinn.
Knut Finne leverte lokale råvarer frå Finnegarden.
Oppskrift på grønkålchips
Vossestrand ungdomsskule brukte frukt.no si oppskrift på grønkålchips og anbefalar fleire å testa denne ut i løpet av vinteren:
1. Varm omnen til 175 grader C.
2. Vask, del og tørk grønkålbetane godt.
3. Kutt av stilken og dei grovaste delane av grønkålen.
4. Bland grønkålen med olje (og ev. litt salt) i ein matboks og rist godt.
5. Sprei bladbetane utover eit steikjebrett og steik til dei er sprø; 10-12 minutt.
6. Dryss ev. meir salt og chilipulver over, og server.