Etter mange år med planlegging legg administrasjonen i Voss herad ved rådmann fram sak om handsaming og endeleg godkjenning av områdereguleringsplanen for Bømoen.

Det  har vore stor interesse rundt planen i lang tid, og det er viktig at planen no vert handsama for å få fastsett overordna arealbruk og føringar på Bømoen.  Dette vil vera viktig for alle partar og  det vil skapa ein føreseieleg situasjon.

Etter utlegging til høyring og offentleg ettersyn kom det inn heile 418 innspel til saka. Dette vitnar om eit stort engasjement. Både tal innspel, innhaldet i innspela og framlegg til plan og vedtak som no ligg føre, viser at innspelsrunde og medverknad er viktig og er med på å foredla og forbetra planar som skal til godkjenning.

Planforslaget som no vert lagt fram til godkjenning, har vekta forholdet mellom å ta vare på viktige friluftsverdiar, aktivitetar, naturressursar og kulturminne opp mot behov for nytt areal for utvikling. Det er gjort ulike prioriteringar for ulike delområde på Bømoen. Viktige og sårbare objekt innanfor planområdet er drikkevasskjelde, kulturminne, naturverdiar og vassdrag. Dei er sikra med omsynssoner og føresegner.

På bakgrunn av innspel, tilsyn frå luftfartstilsynet og faglege vurderingar er det gjort mange gode grep og endringar i planen etter offentleg ettersyn. Det har vore ein konstruktiv dialog, og mange utfordringspunkt er løyst på ein god måte. Endringane handlar om vegsystemet på Bømoen, men og om næringsareal, sikringssone for flyplass og omsyn til drikkevasskjelda.

Trass i god prosess, er det ikkje semje om alt og det gjeld tre område: NÆ1 - Næringsområdet nord for området som i dag er i bruk til fallskjermklubben, vidare gjeld det LHA2 -  Lufthamnføremål sør-aust langs rullebanen og #3 Masseuttak nordaust i Bømoen. Her har ein i prosessen hatt ulike vurderingar kring desse områda. Rådmannen innstiller på at desse tre områda vert tatt ut av planen. NÆ1 Næringsområdet og #3 Masseuttak vert føreslått til LNF-område i planen, medan LHA2, Lufthamnføremål, vert føreslått som buffersone mot flyplassen.

Rådmann Torbjørg Austrud uttalar følgjande i samband med at planen no er sendt til politisk handsaming:

«Me legg no fram ei god plansak med eit breitt kunnskapsgrunnlag som tek inn over seg den tida me lever i. Me har basert våre råd på kva me fagleg meiner er viktig i dag og i åra framover.»

Vidare seier Austrud at det har vore krevjande. «Krevjande på det viset at det har vore omfattande, det er eit stort areal og eit område som har mange interessentar. Det som er bra er at saka får fram kva planlegging eigentleg handlar om, og det er å vega ulike interesser knytt til eit område og til behov i heradet som heilskap. Og, interessene til utbyggjar, andre aktørar eller heradet treng ikkje å vera samanfallande. Så då er det denne avveginga som er gjort, og den er vanskeleg, både fordi det er komplekst og fordi det ikkje er ein fasit.»

Om tida fram til handsaming håpar rådmann Austrud på  «gode og saklege diskusjonar og at våre folkevalde kjem i mål den 13.juni.»

Dokumenta i saka er lagt ut på Møteplan - Voss herad og saka skal fyrst til handsaming i formannskapet 6.juni og i heradsstyret 13.juni.