Naturverkstaden AS
Voss herad har fått 200 000 kr frå Statsforvaltaren i Vestland til prosjektet «Redningsaksjon stadeigen natur». Naturverkstaden AS har fått jobben med å koordinera prosjektet. Naturverkstaden består av Gudrun Folkedal og Benedicte Watvedt Skaug, og har som mål å fiksa naturen – bit for bit.
Dugnad er ein viktig arbeidsmetode i kampen mot framande artar, og heradet lyser no ut ein pott der lag og organisasjonar kan søkja om midlar til å bidra i dugnadsarbeidet. Kvar person som deltek får betalt 150 kr i timen, opp til 15 000 kr per lag/organisasjon. Naturverkstaden administrerer ordninga, og lag og organisasjonar finn søknadsskjemaet på heimesida deira: naturverkstaden.eco
Komande dugnadar
Onsdag 28. mai inviterer Naturvernlaget, Naturverkstaden og Natur og Ungdom til fagleg påfyll om naturrestaurering og felles dugnad langs Vangsvatnet. 11. juni arrangerer Øvre Granvin grannelag kjempespringfrø-dugnad i Øvre Granvin, og Gudrun Folkedal er med og hjelper til som koordinator for Granvin.
Kva kan hageeigarar gjera sjølve?
Mange hageeigarar har framande artar i hagane sine, og det er viktig å handtera desse på rett måte for å hindra spreiing. Framande artar må leverast som restavfall til forbrenning. BIR Voss Hardanger viser til informasjon på heimesidene deira: Har du framande artar i hageavfallet?
Der Naturverkstaden ser at hageeigarar har mykje av enkelte framande artar i hagen, vil dei leggja eit venleg skriv i postkassa med tips om korleis ein kan fjerna desse artane. Dei håpar informasjonen vert tatt godt i mot, og at fleire vil verta med i kampen mot framande artar på Voss.
Kvifor ta opp kampen mot framande artar?
Framandartane spreier seg fort og fortrengjer plantar som høyrer til i floraen vår. Dei trugar naturmangfaldet og aukar risikoen for mellom anna erosjon. I naturmangfaldplanen til Voss herad, vedteken av heradsstyret 6. februar 2025, vert framande artar trekt fram som ei av utfordringane naturmangfaldet vårt står overfor. Difor er eit av måla i planen å redusera negativ påverknad på natur frå framandartar og anna forureining.