Verdifulle innspel frå 80 åringar

Nær femti – 80 og 81 åringar var den 7. juni samla på Vetleflaten omsorgssenter for å få tips frå fagfolk  i heradet om korleis ein kan leggja til rette i bustaden sin, korleis digitale hjelpemiddel kan føra til eit betre kvardagsliv og korleis behovet for mat og ernæring kan endra seg når ein vert eldre. 

Sist endra 28.06.2023 14.45

Kva er viktig for dei eldre sjølve?

Det som skåra aller høgst var det å kunna gå ut i nærmiljøet, kjenna seg trygg i eit samfunn med lite kriminalitet, vera i god fysisk form, samvær med slekt, naboar og vener, tilgang på relevant informasjon og det å ha bra/god privatøkonomi. Å unngå einsemd og å leva i eit samfunn utan negative haldningar til eldre er også svært viktig for denne aldersgruppa. 

Vidare var det mange som hevdar at det er viktig at dei kan bur der dei bur i dag, at det er eit godt tilbod av varer og tenester og gode transportordningar. For mange er det også viktig å kunna køyra eigen bil.

 Her er nokre av tipsa frå fagfolka: 

  • Fysisk trening er viktig for å sjølv kunna meistra aktivitetar. Ikkje gjer trening til noko komplisert. Mange av øvingane gjer ein alt i det daglege. Trening vert til når ein repeterer øvingane. Til dømes det å reise og setta seg. Viktig å laga seg gode vanar på lik linje som når ein pussar tenner kvar dag.
  • For å kunna vera sjølvstendig i eigen heim og unngå skadar er det viktig med tilrettelegging. Enkel tilrettelegging i bustad kan handla om enkle tiltak som det å betra belysninga og fjerna dørstokkar. God brannvarsling er også særs viktig.
  • Velferdsteknologi kan vera ei god løysing for mange. Mange eldre har alt teke i bruk ulike løysingar som til dømes KOMP, medisindispenser, smarthusteknologi og lokaliseringsteknologi (GPS). Legat for eldre og uføre har ytt 250.000,- til innkjøp av KOMP til dei som treng det. Ta kontakt med Røde Kors om dette er aktuelt for deg.
  • Kroppen treng næringsrik mat, og å ta dei næringsrike vala er viktigare no. Alderdommen kan medføra endringar som utfordrar matinntaket ditt og føre til vekttap. Følg difor med på at vekta ikkje går nedover. Mest truleg treng du dei kiloane du har. Ta opp med legen dersom vekta kryp nedover. Dersom du slit med å få i deg nok er det viktig å velje protein og energirike produkt. Det betyr gjerne doble lag med pålegg på skiva, H-mjølk og ekstra med smør/margarin/olje. Bruk klokka til å passe på at du et regelmessig.