Nyheitsbrevet i dag startar med lekkasjer om sjukefråværet.  

Me slapp å søkja innsyn i e-posten frå  HMS-rådgjevaren til kommunalsjef helse og omsorg, sidan denne kom til redaksjonen uoppfordra. Det er gledeleg, og me formidlar meir enn gjerne. 

Tal for 3. kvartal for kommunalavdeling helse og omsorg viser at den positive trenden held fram. Sjukefråværet for månadane juli, august og september er på 6,5 prosent, som er det lågaste registrert i noko kvartal dei siste fem åra. Det er 1 prosentpoeng lågare enn i 2. kvartal i år, og 1,5 prosentpoeng lågare samanlikna med 3. kvartal i 2024. 

HSM-rådgjevar Eolo avsluttar e-posten med desse orda: «Veldig bra!»

Og det sluttar me oss til. 

Folkemøte

Tysdag og onsdag vart dei siste av dei fire folkemøta om kommuneplanen sin samfunnsdel og framlegg til barnehage- og skulestruktur halde. Tysdag var det folkemøte på Vossestrand barne- og ungdomsskule, der det kom så mykje folk at både scena og mange ekstra stolar måtte hentast fram. Onsdga var det møte på Voss ungdomsskule, her var det betre plass.

Det har vore i stor grad same bodskap på alle dei fire møta, men presentasjonane har vore tilpassa dei enkelte grendene. Alle presentasjonane finn du her: Kunnskapsgrunnlag og oppsummering frå medverknadsaktivtetane

Målet med folkemøta har vore å møta innbyggjarane, presentera framlegga og svar ut konkrete spørsmål. Høyringsfristen for begge framlegga er 27. november, før dei kjem til politisk behandling på nyåret.  

Grøn november

I morgon er det Bruktkle-marknad i Kapellandkåken. Det betyr både sal av brukte klede, og kafeen er sjølvsagt open. 

Dette er eit av ei rekkje arrangement som gårfør seg i grøn november. Torsdag 20. november er det Fiksekveld, med redesign og fiksing av klede. Dette skjer i Folkeverksatden på Voss bibliotek. Les meir om andre arrangement i grøn november her: Grøn november

Folkefest

5. desember er det folkefest i kulturhuset. Dette er for å markera at Voss herad var finalist til årets kulturkommune i år. 

Festen er for å feira frivilligheita og kulturlivet, og i biblioteket vert det ein innhaldsrik kveld med varierte kulturinnslag, sofadebatt og kåring av kulturpris. Enkel servering og sal av forfriskningar. 

Festen er gratis, men alle som vil koma må henta seg ein gratisbillett på heimesida til Voss kulturhus.