Det å vera foreldre kan vera ei krevjande oppgåve. I periodar kan foreldre oppleva det vanskeleg å få barna til å samarbeida og å følga beskjedar, og til tider kan det vera så krevjande at ein kjenner seg både rådvill og makteslaus. Kvardagen kan bli strevsam med mykje mas, krangling og kjefting.

Døme på situasjonar som kan vera vanskelege er når barnet skal legga seg, stå opp, pussa tenner, gjera lekser, vera med på butikken eller at barnet generelt ikkje fyl beskjedar frå deg.

Å få hjelp til å bryta ei slik utvikling kan vera godt for både foreldre og barn. I PMTO og TIBIR er det er fokus på å møta barnet på han/hennar sine kjensler, samt byggja gode relasjonar mellom barn og foreldre. 

Voss herad tilbyr gratis foreldreveiledning.

I Voss herad har me fleire ulike tilbod. Tilboda vert tilpassa den enkelte familie sine behov.

TIBIR foreldrerådgjeving

Dette er eit tilbod til foreldre som strever med små eller større situasjonar i kvardagen med barnet sitt. Her lærer ein å ta i bruk verkty som gjer foreldrerolla lettare, og aukar den positive samhandlinga mellom barn og foreldre. Rådgjevinga varar frå 3-6 møter, alt etter behov og ønskje frå foreldra.  

PMTO-terapi

Til foreldre som har opplevd samspelet med barnet sitt vanskeleg over tid. Målet er å fremja samarbeid og positiv utvikling hjå barnet. Terapeuten samarbeider med foreldra om å skapa ein trygg og føreseieleg kvardag for barnet. Endringsarbeidet går over tid, frå 15-30 møter, eller så lenge det er behov.

PMTO foreldregrupper

Det er òg mogeleg å få veiledning i grupper. Gruppetilbodet strekker seg over 12 veker, der gruppa møtest 2 ½ time, ein gong i veka.

TIBIR Sosial ferdigheitstrening

Samtidig med at foreldre får PMTO-terapi eller TIBIR foreldrerådgjeving, kan barnet møta ein sosial ferdigheitstrenar. Det kan vera hjelp og øving i å handtera vanskelege kjensler, sinne og det å trena på positive sosiale ferdigheiter.

TIBIR Konsultasjon

TIBIR Konsultasjon er eit tilbod om veiledning til personalet i barnehagar og skule/SFO. Tilbodet strekker seg over 6-8 møter.

I PMTO og TIBIR lærer foreldre verkty som dei brukar heime med barnet sitt for å få til ei positiv utvikling. 

• Gode beskjeder
• Ros og oppmuntring
• Positiv involvering
• Kommunikasjon 
• Kjensleregulering
• Grensesetting
• Dataspel og nettvett

www.pmto.no

www.nubu.no

www.ungsinn.no