Kva er ein koordinator?

Ein koordinator hjelper deg med å få oversikt og sørgjer for at dei som hjelper deg, samarbeider godt. Koordinatoren:

• samordnar tenestene du får
• kallar inn til møte med dei som er involverte
• følgjer opp den individuelle planen din

Koordinator blir valt i samråd med deg, og er ein tilsett frå ei av tenestene du allereie får hjelp frå. Kommunen har ikkje eigne tilsette som berre jobbar som koordinatorar.

Typar koordinatorar

• Koordinator: For vaksne, barn og unge med vedtak om helsetenester og behov for langvarige og koordinert hjelp.
• Barnekoordinator: For familiar eller fosterfamiliar som har, eller ventar, barn med alvorleg sjukdom, skade eller funksjonsvariasjonar

Når kan du få koordinator?

Du kan få koordinator dersom du:

• har vedtak om helse- og omsorgstenester
• og har behov for langvarige og koordinerte tenester

Det er altså vedtaket om helsetenester som ligg til grunn for retten til koordinator.  

Har du ikkje vedtak om helsetenester?

Dersom du ikkje har vedtak, men likevel har kontakt med fleire tenester som må samarbeide (som barnehage, skule eller pedagogisk-psykologisk teneste), kan du få ein kontaktperson. Kontaktpersonen hjelper deg med å få oversikt og sørgjer for godt samarbeid.

Individuell plan

Ein individuell plan er eit verktøy som hjelper deg og dei som gjev deg hjelp, å jobbe saman. Planen:

• gjev oversikt over måla dine
• viser kva som skal til for å nå måla
• sørgjer for at alle jobbar i same retning
• gjer samarbeidet meir strukturert og målretta

Digital plan

I Voss herad brukar me DIPS Samspill, ei digital løysing for individuell plan. Med denne kan du:

• få oversikt og følgje opp planen din på nett
• logga inn med trygg ID (som i nettbank)
• vere trygg på at personopplysningane dine er godt beskytta

Du får opplæring i korleis du brukar løysinga når du får digital plan.

Samordning med BTI-modellen

Voss herad brukar BTI-modellen (Betre tverrfagleg innsats) som grunnlag for samordning og koordinering. Digital samhandling i DIPS Samspill vert brukt frå nivå 1 til 3, tilpassa kor komplekst samarbeidet er:

• Nivå 1 og 2: Stafettlogg
• Nivå 2 og 3: Enkelt samspel
• Nivå 3: Individuell plan

Slik sender du ein førespurnad

• Du brukar søknadsskjemaet til helse- og omsorgstenester for å senda inn førespurnaden: Søk helse-og omsorgstenester
• Kommunen vurderer førespurnaden din.
• I samråd med deg vert det peika ut ein tilsett frå ei av tenestene du allereie får hjelp frå som koordinator.