Me er på veg inn til ei veke med mange politisk møte. Både eldrerådet, ungdomsrådet, råd for menneske med nedsett funksjonsevne, utval for kultur og næring, utval for levekår, utval for klima og miljø og formannskapet skal ha møte. Mellom anna skal temaplanen Voss i vekst handsamast i fleire av utvala.

Planen finn du ved å klikka her: Voss i vekst. Vil du sjå sakslista til dei ulike råda og utvala, klikkar du deg inn her: Innsyn Voss herad.

Eldredagen

1. oktober er FN sin internasjonale dag for eldre. På Voss vert denne markert måndag 3. oktober. Eldredagen 2022 skal framheva ansvaret alle nasjonar har for å fremja og beskytta eldre menneske sine rettar, helse og velvære, spesielt i samband med klimaendringane, og illustrere behovet for eldre som aktive agentar.

På Voss satsar me gjennom prosjektet «Leve heile livet – Eit aldersvenleg samfunn» å ta ansvaret vårt med å fremja og beskytta eldre sine rettar, helse og velvære på alvor. Måndag den 3. oktober arrangerer eldrerådet eldrefest på Scandic Hotell. Les meir her: Eldredagen 2022

Leiargruppa

Måndag skal leiargruppa til rådmannen mellom anna få status på korleis det går med implementering av kvalitetssystemet Compilo, og ta ei overordna drøfting på registrering av kvalitetsavvik i organisasjonen. Leiargruppa skal også gå gjennom status i arbeidet med budsjett og økonomiplan.

Sikkerheitsmånad

Oktober er nasjonal sikkerheitsmånad. Dette er ei kampanje med føremål å auka kompetanse og merksemd for ein tryggare digital kvardag. Førre veke var det leiaropplæring innan informasjonssikkerheit, IT, personvern og kommunikasjon. Tor Halvorsen og Trond Arne Myklebust sto for dette, og planlegg ei tilsvarande økt for leiarar som ikkje hadde høve til å møta seinare i oktober.

Temaet er også aktualisert gjennom situasjonen elles  i Europa, og i løpet av oktober vil Tor og Trond halda fleire føredrag om korleis ein kan ha ein tryggare digital kvardag, både på dag- og ettermiddagstid.

Dette er ope for alle tilsette som har høve og interesse. Men det kjem meir informasjon om tid og stad neste veke. Det er også lagt opp til ein kort informasjon til heradsstyret om informasjonssikkerheit og personvern 20. oktober

Friskliv og meistring

Friskliv og meistring (FoM) er eit lågterskeltilbod for alle innbyggjarane i heradet, også dei tilsette. Me har ulike kurs og treningstilbod for deg som ynskjer å meistre kvardagen, eller hjelp til endring av vanar.

Tilboda våre er på dagtid, og heradet skal vera fleksible for at tilsette skal kunne ta del i tilbodet i arbeidstida.
Ta kontakt med frisklivskoordinator Jannicke Lien (telefon: 90673035) for å avtala oppstartstime.
Sjå nettside for meir informasjon: Friskliv og meistring - Voss herad

Ny leiar på PPT

Måndag startar Mette Marit Stark som leiar for PPT. Ho har dei siste åra jobba i kommunalavdeling helse og omsorg.