Skulestad skule er ein barneskule som ligg omlag 3 kilometer nord for Voss sentrum, og har omlag 175 elevar og kring 35 tilsette. Skulen er plassert tett på naturlege omgjevnader, med fjella Lønahorgi og Hanguren,  Melsvatnet og alpinanlegget Bavallen i nærleiken. 

Fleire av trinna har uteskule på timeplanen, i tillegg til gardsbesøk, fjellturar og skidagar, og nyttår då ofte det flotte nærområdet rundt skulen. Skulen jobbar kontinuerleg for å ha ein skulekultur som fremjar læring, trivnad og likeverd. Ved å stimulera elevane sine sterke sider skapar ein nysgjerrigheit, lærelyst og aktivitet. Det er fokus på at elevane skal oppleva å ha forståing av kva dei skal læra og kva som vert forventa av dei, samt å gje attendemelding på arbeid og vegen vidare for å nå måla i læringa.

Skulen har ei eiga avdeling, ASK, som er retta spesielt mot elevar som treng særskild tilrettelegging. ASK kan visa til gode erfaringar i arbeidet med desse borna. Skulen har eit stort uteareal, med eigen sykkelbane, ballbinge, fotballbanar, grindbygg og leikeareal. Skulen legg til rette for læring gjennom leik og aktivitet, og er ofte ute på skuleplassen i undervisninga.

Satsingsområde i Vossaskulen

Vossaskulen arbeider kontinuerlig med kvalitetsutvikling for å skapa gode tenester for brukarane våre.

Skulane i Voss herad arbeider no med implementering av ny læreplan. Eit anna hovudsatsingsområde er digitalisering. Målsetjinga vår er at me innan 2021 skal ha 1:1-dekning med læringsbrett eller PC til alle elevar i Voss herad etter oppsett plan.

Skulestad skule tilbyr leksehjelp for elevar på 2.-4.trinn