Fagplan for toradar i Voss kulturskule
På toradar på Voss vil du få individuell undervisning med ein speletime (22,5 minutt) i veka.
I Granvin kan ein velje mellom gruppeundervisning (kring 3 elevar i kvar gruppe, 45 minutts undervisning i veka) eller individuell undervisning med ein speletime i veka.
Etter kvart tilbod vil du få tilbod om å vera med i toradargruppa «Vossakrutt» på Voss og «G-belgane» i Granvin. Det vil vera nært samarbeid mellom «Vossakrutt» og «G-belgane» i høve repertoar og nokre samlingar saman.
Toradaren (også kalla durspel) er eit folkemusikkinstrument der ein speler melodi i høgre handa og kompar seg sjølv med bassrytmar i venstrehanda samstundes som ein dreg ein belg ut og inn. Lyden vert laga av at lufta i belgen passerer gjennom frie tunger av metall.
Toradaren er ein del av trekkspelfamilien, men skil seg frå det kromatiske trekkspelet ved at det er vekseltonig: kvar knapp gjev to ulike tonar avhengig om ein dreg belgen ut eller inn. I kulturskulen vil du få læra å spela gamaldans og bygdedans frå heile Noreg, og kanskje slåttar frå utlandet også! Toradaren er eit veldig populært instrument på Voss og i Hardanger, og du vil bli med i eit sosialt miljø som speler til dans, deltek på festivalar og tevlingar og speler konsertar.
Overordna mål for eleven
- Få gode ferdigheiter på instrumentet sitt
- Oppleva meistringsglede
- Utvikla seg til å verta ein sjølvstendig utøvar som har glede av musikk gjennom heile livet
- Utvikla evne til samspel og samarbeid
- Få høve til fordjuping som kan danna grunnlag for vidaregåande og høgare utdanning
- Verta ein ressursperson som bidreg til eit levande kulturliv
- Ha kjennskap til lokalhistorie, lokale spelemenn og folkemusikktradisjonen frå Voss og Hardanger
- Opparbeida eit godt gehør
- Utvikla sin eigen spelestil
Fase 1 – nybyrjar (Dei som har spelt i ca. 0-2 år)
- Bli kjent med instrumentet og læra korleis ta vare på det
- Kombinera bass og diskant i enkle melodiar
- Læra god spelestilling og ei god kroppshaldning
- Leggja grunnlag for god speleteknikk
- Læra låtar på gehør med støtte i enkel toradarnotasjon
- Få gode øvingsrutinar
Fase 2 – mellomnivå (Dei som har spelt i ca. 1,5 – 4 år)
- Læra samspel gjennom å vera med i toradargruppa Vossakrutt eller G- belgane
- Spela til dans og konsert åleine eller med lærar og saman med Vossakrutt og G-belgane
- Delta på sjokoladekappleik om ein får høve
- Læra å spela andrestemmer
- Læra om skala, akkordar og rytmar
- Bli oppfordra til å vera med å dansa folkedans på arrangement der dette naturleg høyrer heime
- Delta på større kurs, slik som UngOsa, Strunkeveko, Storhelg i Hallingdal og UngLåt
Fase 3 – vidarekomen (Dei som har spelt i ca. 4-6 år)
- Starta å spela bygdedans (springar, halling, rull og pols) i tillegg til gamaldans (polka, reinlender, vals og masurka)
- Større fokus på lokalt repertoar
- Vidareutvikla evna til å læra berre på gehør og imitasjon
- Laga eigne låtar
- Læra å laga andrestemmer og arrangement på slåttar
- Læra melodibass
- Få speleoppdrag i ulike samanhengar
Fase 4 – høgare nivå (Dei som har spelt i ca. 6 år og oppover)
- spela teknisk avanserte slåttar og ha kjennskap til alle dei ulike gamaldans- og runddanstypane
- utvikla sin eigen spelestil
- jobba med frasering og formidling
- spela til dans åleine
- delta på Landsfestival og Landskappleik i juniorklassen
- spela saman med hardingfelespelarane
- gå over til å spela treradar ved ynskje og utvida repertoaret sitt
- læra vanlege notar ved behov
- bli utfordra til å få ansvar og leia Vossakrutt eller G-belgane musikalsk