Kulturskulen tilbyr gruppeundervisning i biletkunst. 

Påmelding på Voss Herad si heimeside via Kultur, idrett og fritid.

De kan koma med ynskje i påmeldinga.

Utmelding: På epost til oddvar.nostdal@voss.herad.no

Alle menneske er født med ein grunnleggande evne og vilje til å uttrykke seg visuelt. Røynda sett få grenser for born sin fantasi. Undervisinga har som mål å ta vare på og utvikle eleven si skaparglede og kjensle av meistring. Eleven skal utvikle kompetanse i å sanse, skape, reflektere og formidle. 

“Møte med kunstnariske verkemiddel som materiale, reiskap, teknikkar og ein inspirerande undervisning vil gje elevane moglegheit til å utvikle sine evner” -Rammeplanen

Biletkunsttilbodet er for elevar frå 8 år og oppover, og er delt inn i tre ulike grupper etter alder; 8-10 år, 10-12 år og ungdomsskule/vgs. Undervisninga er 90min ein gong i veka, og er tilpassa den enkelte elev og elevgruppa si alder, progresjon og tekniske nivå. Eleven får individuell rettleiing. Gjennom undervisninga vil eleven få kjennskap til, og lære å meistre, fagspesifikke dugleikar i ulike teknikkar, materiale og uttrykk. Eksempel på dette er teikning, måleri, grafikk, skulptur og animasjon.

Det arrangerast nokre små + ei stor utstilling i løpet av året, der alle elevane deltek med elevarbeid. 

Grunnleggande nivå:

Eleven arbeider i hovudsak med individuelle oppgåver, men og tidvis med gruppeoppgåver. Vi vekslar mellom korte «øvingsoppgåver» og oppgåver som går over lengre tid. Eleven vert introdusert for ulike teknikkar som:

· Teikning: Teikning er grunnlaget for all aktivitet innan kunstfagfeltet, både som eigen disiplin, og som ideutvikling og skisseteikning.  Eleven får moglegheit til å arbeide med ulike teikneteknikkar og teiknereiskap. Fokuset ligg på å lære grunnleggande verkemiddel som punkt, linje og lys og skugge. Gjennom teikning aukar forståinga for to- og tredimensjonale kvalitetar, og eleven lærar korleis skape tredimensjonal effekt på todimensjonalt material. Vi arbeidar med å teikne etter gjenstandar/stilleben, og å lære oss å teikne «det vi ser, ikkje det vi trur vi ser», samtidig som vi i andre oppgåver teiknar etter fri fantasi. Eksempel på ulike teiknereiskap er; blyant, kol, tusjpenn, pastell- og oljekrit og fargeblyantar. 

· Måleri: Eleven får kjennskap og erfaring med ulike målemedium, målereiskap måleteknikkar. Eleven får og grunnleggande undervisning i fargelære og komposisjon. Vi tar utgangspunkt i ulike motiv som blant anna landskap, modell og stilleben. Fri fantasi, eventyr eller fortellingar, gjerne eleven sine eigne historier, kan og vere utgangspunkt. Vi arbeidar både figurativt og abstrakt. Eksempel på ulike målemedium er: Akvarell, akryl, tempera, marmorering og pourpainting

· Grafikk: Grafikk er fellesnemninga for ulike trykketeknikkar, og gjennom undervisninga introduserast eleven for trykkekunsten. Eleven får kjennskap til, og erfaring med, høgtrykk (linosnitt, tresnitt, stempel), djuptrykk (kaldnål) og plantrykk (monotypi).

· Skulptur/modellering: Skulptur er eit tredimensjonale kunstverk. Det kan vere av ulike materiale. Elevenlærer å forme i blant anna leire, gips, ståltråd, aluminiumsfolie, papir, naturmateriale og gjenbruksmaterialefor å skape former og skulpturar til ulike formål. Vi arbeidar med både figurative og abstrakte skulpturar. 

· Animasjon: Animasjon er ein illusjon av rørsle som oppstår når ein viser stilleståande bilete fortløpande etter kvarandre. Eleven får moglegheit til å prøve ut enkel stop-motion-animasjon ved hjelp av ulike teknikkar som f.eks. teikning, forma figurar i plastelina og foto av ulike gjenstandar/menneske.

· Kunsthistorie: I enkelte oppgåver arbeidar vi med inspirasjon frå ulike kunstnarar. På denne måten vil eleven vil få innblikk og kjennskap til ulike kunstepokar og tidsperiodar.

· Samarbeidsprosjekt: I tillegg til eigne utstillingar brukar vi og å gjennomføre ulike samarbeidsprosjekt, blant anna med Vossajazz. Her arbeidar vi ofte med gitte tema, og med oppdrag om å dekorere/skape kunst til eit fastlagt område. 

Viderekommande nivå:

Går eleven på biletkunst over fleire år vil ein etterkvart vidareutvikle teknikkane frå grunnleggande nivå og sin eigen kunnskap kring kunstfaget. Større og meir opne oppgåver kor eleven sjølv kan velje teknikk gjer at ein kan sette sitt eige preg på prosjekta, og eleven kan ha fokus på å utvikle sin eigen stil/uttrykk og kreativitet. Kunst vert meir enn berre ein teknikk og eit handverk. På vidarekommande nivå vert det meir dialog om kva eleven ynskjer å formidle, og kva som må til for å få til dette. Den skapande prosessen frå idè til ferdig produkt er i fokus gjennom prøving og feiling, observasjon, refleksjon og sjølvstendig tenking. Samstundes øver vi på å vere tolmodige og å gjere seg flid med arbeidet. Eleven vert oppmuntra til å utvikle sin kritiske sans, og til å sette krav til eige arbeide. 

Breddeprogram

Forventning til læraren:

·       skapar eit læringsmiljø prega av oppleving, kreativitet og samhandling

·       vektlegg prosess og meistring

·       gjev rom for elevane sine tankar kring eige arbeid

·       legg til rette for kunstfagleg aktivitet, vere kulturformidlar og inspirator

·       tilpassar oppgåver og opplegg til kvar enkelt elev.

·       har stor fagleg kompetanse innanfor ulike teknikkar og materiale. 

·       legg opp til variert undervisning

Læringsmål

Eleven:

·       har grunnleggande ferdigheiter innanfor ulike teknikkar

·       har erfaring med, og kunnskap om, ulike materiale.

·       kan grunnleggande faguttrykk 

·       oppleve skaparglede og fagleg utvikling

·       lærar gjennom leik, utforsking, eksperimentering og refleksjon

·       deltek i kreative prosessar saman med andre elevar

·       deltek med sine arbeid i utstillingar

·       nyttar tida godt i undervisningsøktene

Kjerneprogram

   

Forventningar til læraren

·       legg til rette for god fagleg progresjon og kontinuitet

·       stimulerer eleven sitt personlege uttrykk og formidling

·       lærer eleven å observere og omarbeide sanseinntrykk

·       stimulere til oppleving og skaparglede

·       legg til rette for reflekterte samtalar og utvikling av sjølvinnsikt

·       vurdera både prosess og produkt saman med eleven

·       er fagleg rollemodell, arbeidsleiar, kulturformidlar og inspirator

·       legge til rette for godt arbeidsfellesskap og skaper et godt sosialt miljø

Læringsmål

Eleven:

·       meistrar og videreutviklar grunnleggande ferdigheiter i ulike teknikkar, materiale og uttrykk

·       har tileigna seg eit bredt spekter av materialkunnskap

·       har deltatt i skapande prosesser frå idé til ferdig produkt

·       har utvikla kritisk sans, flid og tolmod

·       har tileigna seg nødvendig faguttrykk og omgrep for å kunne tolke og samtale om visuelle uttrykk

·       reflekterer over eigen læring og utvikling

·       delar erfaringar med medelever

·       er forberedt til, og nyttar tida godt i undervisningsøktene