Brannstasjonen på Tvildemoen vart tatt i bruk tidlegare denne månaden, og har alt hatt fleire oppdrag, både hjå seg sjølve, i nærområdet sitt og lengre unna. Neste laurdag er det opningsfest, der brannsjef David Skjerven inviterer heile bygda, plluss Bjørnis, til pølsefest. Det vert snorklipping ved ordføraren, omvisning i brannstasjonen og show med Bjørnis. Brannsjefen har kjøpt to tusen pølser frå Vossakjøt, og håpar dette er tilstrekkeleg for alle som kjem. Festen er frå klokka 10 til 14 laurdag 6. desember.

Biletebevis frå Voss ungdomsskule om at måltidet ikkje berre vart smakfullt, men også fint å sjå på.

Mat av lokale råvarer

Tidlegare denne månaden fekk alle 9. klassene i Voss herad ei matkasse med lokale grønsaker frå Finnegarden. Utgangspunktet for oppgåva var at handelssystemet har brote saman, og me må klara oss med råvarer som er produsert på Voss. Oppgåva var ein del av arbeidet med eigenberedskapsveka og Grøn november, og elevane skulle laga eit godt og mettande måltid av råvarene i matkassa, og slik læra om lokal mat og korleis nytta ressursane best mogleg. 

Resultatet vart både rotfruktgrateng, jordskokksuppe, eplekompott og den nye favoritten, grønkålchips.- Les meir og få oppskrifter og inspirasjon her: Grønkålchips - ein ny favoritt

Slik melder du inn glatt veg

Voss herad har godt over 300 kilometer med bilveg, pluss mange fortau og gang- og sykkelevegar. Med omskifteleg vêr og temperatur, er det krevjande halda alt dette brøyta og strødd så det er trygt for alle til ei kvar tid. 

I eit så vidtrakt herad er det naturleg at innbyggjarar og tilsette vil melda frå når det er glatt der dei er, men det er ikkje så lett handtera alle som tek kontkat samtidig, korkje for innbyggjarservice eller driftsavdelinga. Det lettaste for alle partar er at dette vert meldt inn via eit skjema som kjem direkte til den gode driftavdelinga vår, som så prioriterer så godt det let seg gjera. Skjemaet er nokså enkelt, og består av eit påkravd felt som handlar om kva strekning som treng brøyting eller strøing, og eit valfritt felt der du kan skriva inn namn og telefonnummer om du ynksjer det. Skjemaet finn du her: Meld inn behov for brøyting og strøing

Og hjelp oss gjerne med å formidla dette dersom du snakkar med folk som ikkje er tilsett i heradet, slik at flest mogleg veit korleis dei kan melda frå. 

Nikolai saman med pianolærar John Taylor

Pianomeister frå Voss

Unge Nikolai Tuchto vann sist helg musikkonkurransen Bergen Pianomester 2025, ei konkurranse for born og unge født etter 2006.

Nikolai er elev ved Voss kulturskule, og både Nikolai og foreldra rettar ein stor takk til pianolærarane John Taylor og Marisa Tayler ved Voss kulturskule etter at prisen vart delt ut. 

– Deira støtte, tolmod og dedikasjon har vore uvurderleg, skriv familien til Nikolai. – Dette viser kor mykje talent, dedikasjon og hardt arbeid som finst lokalt, frå elevar, lærarar og heile kulturskulemiljøet. 

Me stiller oss heilt bak, og gratulerer Nikolai og familien med prisen!

Innkjøpsstrategi 

Voss herad har fått ein ny innkjøpsstrategi som vart vedteken av heradsstyret tidlegare i november: Innkjøpsstrategi for Voss herad 2025-2030

Innkjøpsstrategien har fire mål:

1. Me skal bidra til å nå klima- og miljømål gjennom berekraftige og innovative innkjøp
2. Me skal nytta innkjøpsmakta vår til å fremja sosial rettferd og inkludering
3. Innkjøpa våre skal støtta opp under arbeidet med økonomisk omstilling og tenester med rett kvalitet
4. Me skal ha effektive, sikre og profesjonelle innkjøp og kontraktsoppfølging

Møbelhandel

Voss herad har også fått ein ny rutine for kjøp av møblar, som  gjeld for alle som kjøper møblar i Voss herad: Innkjøpsrutine for møblar i Voss herad 2025-2027

Medan butikkane i dag sym over av nye varer til nedsette prisar, går Voss herad i motsett retning og satsar på brukt framfor nytt. I verktøyet Loopfront kan alle leggja inn møblar dei ikkje lenger nyttar på arbeidsstaden sin. Desse vert tilgjengelege heilt gratis for andre i heradet. Ein avtalar henting direkte med kvarandre. I den nye møbelrutinen skal ein alltid fyrst sjekka om møbelet ein treng ligg i Loopfront.

Voss herad er tilslutta Bergen kommune sin rammeavtale for møblar, og tidlegare i november tredde ein ny rammeavtale i kraft.  I rammeavtalen er det ulike leverandørar etter ulike fagområde. Det som er nytt ved denne rammeavtalen er at møbelleverandørane skal kunna tilby brukte møblar i tillegg til nye, og difor skal me alltid sjekka om møbelet me treng finst brukt på rammeavtalen. Dersom møbelet ikkje finst korkje i Loopfront eller brukt på rammeavtale, kan ein kjøpa nytt.

Desse tersklane før me kjøper nye møblar er ikkje berre i tråd med Vossaklima 2030 og den nye innkjøpsstrategien  – det er også i tråd med Voss iPluss 2027.

Dersom du treng å bli lagt til i Loopfront, eller har spørsmål til verktøyet, ta kontakt med klima- og miljørådgjevar Lina Hamre. Dersom du har spørsmål til innkjøpsstrategien eller rammeavtalen for møblar, ta kontakt med innkjøpsrådgjevar Christine Wetzel.

Budsjett og økonomiplan på høyring

Formannskapet har lagt ut si innstilling til budsjett og økonomiplan på høyring og offentleg ettersyn. Høyringa går til 8. desember, før budsjett og økonomiplan vert vedteke av heradsstyret i møte 11. desember. 

Framlegg til budsjett finn du her: Budsjett- og økonomiplan

Høyringsinnspel kan sendast postmottak@voss.herad.no, merk e-posten med “Høyring budsjett 2026”