Kven kan få korttidsopphald?

Rehabiliteringsopphald

Du kan få rehabiliteringsopphald dersom:

• Du er utskriven frå sjukehus og treng vidare opptrening før du kan flytte heim
• Du har behov for å starte opp rehabiliteringstiltak og tilpassing av bustaden før heimreise
• Du har hatt funksjonsendringar på grunn av sjukdom eller alder, og treng hjelp til å trene deg opp att

Behandling og utgreiingsopphald

Du kan få behandling eller utgreiingsopphald dersom:

• Du har behov for døgnkontinuerleg observasjon, oppfølging eller medisinsk behandling
• Du treng ei vurdering av helsetilstand og funksjon for å planleggje vidare behandling og omsorg
• Du har behov for lindrande behandling og omsorg ved alvorleg sjukdom

Vekselopphald

Du kan få vekselopphald dersom:

• Du har behov for regelmessig opphald i institusjon for å oppretthalde helsa
• Du og dine pårørande har behov for ein forutsigbar rytme mellom heimebuing og institusjonsopphald

Avlastningsopphald

Du kan få avlastningsopphald dersom:

• Du bur heime og får omfattande hjelp frå pårørande
• Pårørande har behov for avlasting på grunn av særleg tyngjande omsorgsoppgåver

Merk: Kartlegging ved kognitiv svikt skal som hovudregel gjerast i kjende omgjevnader, og ikkje som del av korttidsopphald.

Augeblikkeleg hjelp opphald

Informasjon om opphaldet finn du her: 

Augeblikkeleg hjelp - kortvarig opphald

Slik vurderer me søknaden din

Når du søkjer om korttidsopphald, vurderer me:

• Om du har behov for etterbehandling og opptrening etter sjukdom eller funksjonsendringar
• Om du treng medisinsk behandling og pleie som ikkje kan givast heime
• Om du har behov for tett og tverrfagleg oppfølging frå helsepersonell
• Om det er behov for ei grundig vurdering av helsetilstand og funksjon, for å planleggje vidare behandling og omsorg
• Om du eller dine pårørande har behov for avlasting

Me vurderer alltid om kartlegging og oppfølging kan gjerast i heimen eller i kjende omgjevnader, spesielt ved kognitiv svikt.

Kven kan få langtidsopphald?

Langtidsopphald i sjukeheim eller anna institusjon er for deg som har varig behov for pleie og omsorg heile døgnet. Du kan få langtidsopphald dersom:

• Du har eit varig fysisk eller psykisk funksjonstap og klarar ikkje daglege gjeremål
• Du treng omfattande helse- og omsorgstenester som ikkje kan givast i heimen
• Du har behov for medisinsk behandling som ikkje kan gjennomførast heime, til dømes ved alvorleg sjukdom eller demens
• Du treng pleie og omsorg ved livets slutt
• Du har allereie prøvd andre tenester, som heimesjukepleie eller omsorgsbustad, utan at det har vore tilstrekkeleg
• Det er ikkje sannsynleg at du kan flytte heim igjen

Langtidsopphald blir vanlegvis gitt for ein lengre periode, eller livet ut.

Slik vurderer me søknaden din

Når du søkjer om langtidsopphald, gjer me ei grundig vurdering av situasjonen din. Me ser på:

• Om du har prøvd andre tiltak – Me vurderer først om du kan få hjelp gjennom heimesjukepleie, heimehjelp eller tilrettelagt bustad
• Evna di til å ta vare på deg sjølv – Me kartlegg kor mykje du klarar sjølv i kvardagen
• Helsetilstanden din – Me vurderer både fysisk og psykisk helse, og om du har behov for medisinsk behandling eller tilsyn heile døgnet
• Bustaden din – Me ser på om bustaden din er trygg og tilrettelagt for dine behov
• Nettverket ditt – Me vurderer om du har pårørande eller andre som kan hjelpe deg

Me gjer ei samla fagleg vurdering basert på desse punkta. Dersom langtidsopphald er det einaste forsvarlege tilbodet, kan du få plass i sjukeheim eller tilsvarande bustad med døgnkontinuerleg omsorg.

Har du svekka helse, kjenner deg utrygg, eller har vanskar med daglege gjeremål? Då kan du få hjelp frå Voss herad til å bu trygt heime så lenge som mogleg. Du kan få hjelp til:

• å få låne hjelpemiddel (digitale hjelpemiddel og manuelle hjelpemiddel)
• tilpasse bustaden din
• heimerehabilitering
• førebyggjande heimebesøk
• heimesjukepleie
• heimehjelp

Kvifor tilbyr me denne hjelpa?

Regjeringa har starta ei nasjonal satsing for at fleire eldre og personar med svekka helse skal kunne bu heime lenger. Målet er at du skal få leve eit trygt og sjølvstendig liv i ditt eige heimemiljø, og få den hjelpa du treng – når du treng det.

Voss herad støttar opp om denne satsinga ved å tilby tenester som gjer kvardagen enklare og tryggare for deg som ynskjer å bu heime.

Du må betale ein eigenandel når du bur på sjukeheim. Me gjer merksam på at det blir gjort eit etteroppgjer året etter opphaldet. Dette skjer samtidig med skatteoppgjeret ditt, eller ved førehandslikning.

Grunnbeløpet i folketrygda er per 1. mai 2025: 130 160 kr

Endring i inntekt kan påverke eigenandelen

Dersom inntekta di endrar seg, kan det føre til at eigenandelen du betalar for sjukeheimsopphald også vert endra. Det er difor viktig at du gjev beskjed til sjukeheimen kvar gong inntekta eller skatten din endrar seg. Då kan Voss herad gjera eit nytt vedtak om eigenandel.

Korleis betalar du?

• Korttidsopphald: Du får tilsendt faktura.
• Langtidsopphald: Eigenandelen vert som regel trekt direkte frå pensjonen eller trygda di. Dersom dette ikkje dekkjer heile beløpet, får du faktura på resten. 

Faktura for eigenandel vert sendt etterskotsvis kvar månad.

Voss herad har fleire sjukeheimar. Du finn informasjon om sjukeheimane her:

Voss sjukeheim

Granvin sjukeheim

Vossestrand omsorgstun

Vetleflaten omsorgssenter

Lover og forskrifter

Langtidsopphald i sjukeheim og andre helse- og omsorgstenester er regulert av fleire lover og forskrifter. Desse skal sikre at du får forsvarleg hjelp og at rettane dine blir tekne vare på.

Lover

• Forvaltningslova – Regulerer saksbehandling og rettstryggleik i offentleg forvaltning
• Helse- og omsorgstenestelova – Kommunen sitt ansvar for helse- og omsorgstenester
  Sjå særleg § 3-2, første ledd nr. 6 bokstav c
• Pasient- og brukarrettighetslova – Rettar du har som pasient og brukar
  Sjå særleg § 2-8 om tiltak ved særleg tyngande omsorgsoppgåver
• Sosialtjenestelova – Regulerer sosiale tenester i kommunen
• Helsepersonellova – Reglar for helsepersonell sitt ansvar og plikter
• Rett til eigen tros- og livssynsutøving – Du har rett til å utøve trua di, også i institusjon

Forskrifter

• Forskrift om kvalitet i pleie- og omsorgstenestene – Skal sikre forsvarleg og verdig tenesteyting
• Forskrift om eigenandel for kommunale helse- og omsorgstenester – Regulerer betaling for tenester
• Forskrift om en verdig eldreomsorg – Skal sikre at eldre får ein verdig alderdom
• Forskrift om tildeling av langtidsplass i sjukeheim – Regulerer kven som har rett til langtidsopphald
• Forskrift for sjukeheim og buform for heildøgns omsorg og pleie – Regulerer drift og krav til institusjonar
• Forskrift om habilitering og rehabilitering, individuell plan og koordinator – Rettleiing og oppfølging for brukarar med samansette behov